الشاعرة/جود بنت فارس العتيبي
يافاتنه عفيت نفسي وعفت
النفس طابت مابقى شي ترجيه
يكفي ماراح اوجاع قلبي ماخفت
يكفيك مني كل شي اخذتيه
الفقد شين ودمعة العين جفت
شابت عيون الي فقد شوف غاليه
انا من الصدمه قعدت اتلفت
مصدوم مايدري عن الي يسويه
والفرحه بصدره باثرها توفت
ولايجبر مصابه عزا من يعزيه
دنياه دارت قدم عينه ولفت
لاراجي غيره ولاهو بناسيه
صدق المعاني بين اياديه صفت
واستبسلت مع قافه الي يغنيه
حامت طيوره ولجناحيه رفت
حاول لكن الكسر عيا يخليه
الكون واسع والسعاده توفت
في صدر من حزنه معه مايخليه
يافاتنه كفي ترا النفس عفت
اخذتي افراحي وش الي عطيتيه