الشاعرة فرس سعودية
تعال اضمك والتوي فيك بالحيل=اطفي ضما روحن بدونك عليله
يوم التلاقي فيه كل التفاصيل=لو انها لحظات ذكرى جميله
انا عرفتك شامخاً كنك سهيل=هيبة شموخك مالقينا مثيله
حبك بقلبي غير مافيه تأويل=مشاعراً فيها الخصال النبيله
الشوق مايطفيه كثر المراسيل=العمر مره وانت مافيك حيله !!
عزفت لك شوقي بصوت المواويل=بين الرجا والرغبه المستحيله
لولاك مالمحت لي بالمداخيل=سكت بجروح الكلام الثقيله
مفتون بك مابي للاسباب تعليل=هواك لي غايه وشوفك وسيله
كم جيت لك واقفيت مامن محاصيل=بين الامل واليأس مالي حصيله
عذبتني يوم الليالي تساهيل=وحنيت لي يوم الليالي بخيله
حنيت لي لكن عقب هدة الحيل=ضيعت منا اوقات ماهي قليله
في غيبتك طال الوهم والغرابيل=دموع عيني مثل وبل المخيله
اشعلت في ليلك شموع وقناديل=قمراء لحالات الغياب الطويله
لك مني ازهد بالفرح والتعاليل=اجنح لنوبات الغرام الجزيله
ياما انتظرتك يحترق فيني الويل=اسهر على ذكراك في كل ليله
ياما تشربتك نفس نكهته هيل=انت وانا والشوق نفس الفصيله
ياما نزف ظلك طعون العواذل=قلبي معك تايه وضيع دليله
اشيل همك والليالي مقابيل=لكن افراقك حمل مقدر أشيله
والله احبك موت ياصفوة الجيل=ماغير حبك بالضلوع النحيله
يفداك عمري بس لاينقص الكيل=الهرج يكفي عن كثيره قليله